BADOMORI----Rehabilitasaun estrada iha suku Bado-Mori kuazé 7 kilometru, oras ne’e paradu tanba, falla orsamentu hodi kontinua projetu, Rural Development Programe Four (RDP4) ne’ebé apoiu husi Internasional Labour Organization (ILO).

Tuir benefisiariu Gaspar do Rego katak, implementasaun projetu ne’e kompañia lokal tolu mak responsaviliza hanesan Finlos, Maubere Spirit no Caidai-Lale unip.LdA, maibe dadaun ne’e paradu hotu, tanba orsamentu kuazé husi kompañia 50% hotu ona no hein fali 50% husi governu atu nune’e bele kontinua fila fali.

“Ami hanesan benefisiariu ba estrada ida ne’e ami nia hakrak atu kontribui oinsa estrada ne’e bele remata, tanba ami nia hakarak projetu ne’e tenke hotu ona iha tinan ne’e nia laran nune’e mós data konstrusaun iha BOQ remata iha fulan hirak liu ba.

Maibe projetu ne’e seidauk remata, tanba tuir inforasaun ne’ebé mak ami nudár komunidade sira rona no hatene katak orsamentu husi kompañia 50% remata ona hodi hein fali orsamentu husi governu atu kontinua,” hateten komunidade Gaspar.

Gaspar akresenta tan katak, konstrusaun estrada iha suku refere (Bado-Mori), la tuir ninia BOQ, tanba bazea ba data kontratu remata ona iha fulan hirak liu ba (2017), maibe até agora seidauk remata. Maske ho prekupasaun ne’ebé iha nudár komunidade oinsa atu kontribui mos ba liu husi meus ne’ebé mak iha atu nune’e bele aselera lalais obra ne’e.

Nia lamentadu mos konaba projetu ne’e, tanba tuir lolos obra ne’e kompañia mak atu toma responsabilidade até remata hafoin intrega, maibe hare ba projetu ne’e estrada rural, tan ne’e servisu hotu fo ba komunidade sira mak atu servisu no ikus mai obra ne’e sai tarde.

Entertantu iha parte seluk Xefe suku Baha-Mori Estanislau da Silva banhira BT halo kofirmasaun iha domingu foin lalais ne’e katak, projetu ne’e mai husi ILO atu implementa iha suku Bado-Mori ho distansia 7 kilometrus no projetu ne’e nia durasaun fulan tolu, maibe ate agora seidauk remata, tanba orsamentu.

Tanba ne’e nia husu ba komunidade tenke pasensia no simu realidade, tanba kestaun orsamentu tarde mai husi governu, tan ne’e mak projetu ne’e paradu, maibe la signifika atu paradu, maibe hein orsamentu iha hafoin bele kontinua fali.

Nia realsa liu tan katak, implementasaun projetu ne’e 50% remata ona no hein 50% atu remata, maibe sei iha prosesu nia laran tanba projetu ne’e komunidade mak durante ne’e halo. Lider Lokla ne’e argumenta, projetu ne’e hahu husi suku Berkoli aldeia Uiaté Betunau to’o iha Bado-Mori aldeia kaiatula,banhira 7 kilometru ne’e ramata sei kontinua tan ba Darlata (Uatubibi) ho distansia kilomtru 4.

“Projetu ne’e mai husi ILO ho nia distansia 7 kilo, maibe projetu ne’e seidak remata, tanba orsamentu tarde hodi hein mai husi governu nomos projetu ne’e atingi ona 50% no sei falta 50% para remata, maibe sei iha prosesu nia laran.

Tanba projetu ne’e hahu husi suku berkali mai to’o iha suku baha-mori, alende ne’e mos banhira 7 kilo ne’e remata parseru sira sei kontinua tan kilometru 4 para to’o iha Darlata aréa (Uatu-Bibi),” nia informa. Maske notisia ne’e atu halo publikasaun, maibe BT sedauk halo konfirmasaun ho kompañia, tanba prosesu hotu kompañia iha responsabilidade konaba material nomos orsamentu ba implementasaun projetu ne’e. (BT)