OSSOALA----Komunidade aldeia rua iha suku Osoala, Postu Administrative Vemasse Munisipiu Baucau, asesu ona ba bee-mos, tanba liu husi  projetu SRRI  no programa UNDP.

Komunidade nebe mak hetan benefisiariu ba bee moos ne’e iha aldeia Uai-Knasa ho total xefi familia 110, no total populasaun hamutuk 484 nomos aldeia Hoi-Nawai total kk 58 ho total populasaun hamutuk 267.

“Sentimentu ne’ebé durante ne’e komunidade sira iha suku Osoala infrenta oras ne’e daudaun diak ona, tanba ne’e mak nia parte husu agradese ba governu no agensia internasional hanesan UNDP kontinua tan programa seluk atu implementa iha suku ne’e,” dehan xefi suku Osoala Tomas dos Reis Amaral ba jornalista sira hafoin remata serimonia inagurasaun, sexta 12/02 semana ne’e.

Nia dehan suku Osoala durante tinan barak konsumu bee moos iha mota laran, maibe liu husi programa SRRI liu husi PDD oras ne’e kanaliza duni bee mos ne’e ba duni komunidade. 

Kanalizasaun bee moos ne’e, ho nia distansia 13 kilometru husi suku Loilubu, Uatu Lari mai to’o iha suku Osoala ho total orsamentu $83,878 no obra ne’e jere husi kompañia Encosta Unip Lda. Entretantu Secretariu Estadu Administrasaun Estatal, Samuel Mendonsa hateten tinan ne’e projetu barak lao iha suku Osoala. 

“Ita agradese barak ohin ha’u rona relatoriu lubuk ida husi autoridade lokal sira katak, iha timor ne’e iha suku Osoala projetu lubuk ida tama kada tinan 10 projetu barak tebtebes mak tama iha timor laran, iha Osoala tinan 10 mak barak hanesan ne’e  timor laran tomak projetu barak tebtebes ne’ebé ejisti iha timor maibe," ema iha Osoala lahatene hau hanoin liu husi inagurasaun hanesan ne’e ema foin bele hatene,” dehan Samuel Mendonsa.

Nia hatutan, projetu ne’e projetu komunitariu, ida mak PDD, PDDI/II, PNDS no projetu seluk mak SRRI, I projetu SRRI ne’e ki’ik, maibe ninia benefisiariu ne’e bo’ot tebtebes ba futuru atu protese ita nia rain. Tanba projetu ida ne’e projetu mudansa klimatika internasional nebe halo kooperasaun ho ministeriu MCIA hamutuk ho MAE nebe Kke liu husi dalan parseru internasional nian liu husi UNDP.


Kuandu projetu SRRI iha Baucau implemnta ona iha Baucau liu-liu iha suku Osoala nia parte husu agradese ba komunidade tomak labele estraga, tenke kuidadu, tanba ida ne’e hela ba povu Osoala oan sira atu uza. 

Entertantu iha fatin hanesan Sekretariu Munisipiu Baucau, Francisco Xavier da Silva Guterres husu ba governu atu rona komunidade nia halerik ne’e lori ba atu tetu para iha tinan oin mai bele inplementa tan iha suku Osoala.

Nia hatutan iha prosesu dezenvolvimentu ema temi governu, sosiadade sivil nomos komunidade, iha buat tolu ne’e mak hanaran boa governasaun. “Ita nia governu halo planeamentu servisu hamutuk ho ONG internasional sira hafoin tama ba segundu faze ema hanaran implementasaun depois ba terseiru faze mak komunidade ka benefisiariu.

Nia husu ba komunidade sira iha Osoala, tanba benefisiariu ba obra ne’e nain mak komunidade tan ne’e mak tenke kuidadu kuandu át labele husu ba governu  komunidade rasik mak hadia rasik. “Iha suku Osoala ema estraga dala tolu konaba kanalizasaun bee moos ne’e, tanba kompañia rasik ba halo keixa iha komisaun aprovisionamentu hafoin rezolve hotu ate ohin komunidade sai duni benefisiariu ba obra ne’e,”dehan nia. 

Nia dehan katak ba tinan ne’e suku Osoala hetan projetu 7, tanba implementasaun ne’e mai husi parseru no governu nebe uniku tebes ba suku Osoala, tanba Osoala hetan projetu barak liu iha suku hotu hotu iha Timor Leste. (BT)