DILI----Sekretaria estadu ba politika formasaun profisional  no empregu (SEPFOPE) foin lalais  ne’e halo inspensaun jeral ba empreza hamutuk 991. Husi numeru ne’e iha empreza hamutuk 128 mak  viola hela lei traballu nian.

“Atividade ba tinan ida ne’e ami halo inspensaun   ba 991 emprezas,  husi  numeru  ne’e ami halo vizita  ne’e  porvolta 128 emprezas ne’ebé mak durante ne’e viola lei traballu nian,”  hateten   Inspetor Jeral Traballo Aniceto Leto Soro ba jornalista sira iha salaun SEPFOPE  tersa 20/10 foin lalais ne’e. Nia hatete relasaun ho violasaun ba lei traballu ne’e, governu aplika multa ba empreza sira. Empreza ne’ebé viola lei ne’e grave  multa osan  ho total $123 mil ba estadu.

Nia dehan kazu violasaun ba lei traballu ne’e barak liu mak ba traballador kontratadu. Kompañia sira halo kontratu ho traballador sira maibe empreza 56 mak la fo kontratu ba traballador  sira. Segundu  kazu mak  ema la kompri kona-ba seguransa saude higene do traballo nian hamutuk 35 empregas. “Hanesan kazu ki’ik oan sira ne’ebé mak ita haree la dun boot, maibe  kazu ne’ebe mak boot sira sei hetan sansaun mak hanesan multa ba estadu  tuir lei traballo artigu 99 no 98  dekretu lei 19/2010 artigu 49, ita fó multa minimu liu mak  $230, boot liu mak $1,150, maibe depende ba nia gravidade,” nia esplika.

Nia informa to’o ohin loron   total multa ne’ebé governu rekolla husi empreza sira hamutuk $123 mil iha fulan ida ne’e.  Nune’e mos husi 183 empreza iha 70% mak selu multa no  30% sei iha prosesu nia laran. Empreza sira ne’ebé viola lei ne’e  barak liu empreza sira internasional kompara ho empreza nasional sira. (BT)