DILI----Empreza nasional Figus Sol Noscente hahu produs xa no tua  husi ai figeira tahan. Produtu ai figeira bele transfoma sai produtu barak iha Timor-Leste. Tanba ne’e mak empreza Figus Sol Noscente hakarak dezenvolve ai ne’e.

Diretor Figus Sol Noscente, Hugo Natalino Conoel Lebre esplika katak sira sei dezenvolve produsaun ai figeira fahe ba parte tolu. Primeiru kultura ai figeira iha Timor-Leste, segundu oinsa halo ai figeira sai produtu lokal iha Timor, terseiru  agrikultura figus nian forte ona bele aloka ba merkadoria. Nia husu ba komunidade sira atu kuda ai figeria tanba ai ne’e iha ninia potensia 

“Ami halo ona projetu pilotu ida agora dadaun ne’e ami kuda tan ai figeira hamutuk 400, iha jardin  Senai ami  fahe ba munisipiu 13 ho rai ketan rua Oe-cosse to’o Lospalos, iha futuru plantas figeira bele sirkula iha  rai laran,” dehan  Hugo ba BT,  kinta, 22/10  iha nia knar fatin Becora Dili. Empreza ne’e sei kontinua mantein home industria ai figeira  atu nune’e produtu ne’e bele eziste iha Timor-Leste. Ohin loron Figus Sol Nascente sei hamosu  merkadu traballu liu husi ai figeira hodi hetan xa no tua. Produtu xa ne’e bele kura ba moras mi fatuk, liman ain sin, hatun bokur inklui mos moras  strok.

Home industria lao hodi akompaña  nia ezistensia programa  figeira nian maibe fokus maka’as hodi kuda  atu nune’e bele habelar hahu husi nasional ba baze. Nia afirma  katak, iha tinan kotuk 2014 nia sai  primeiru lugar iha kompetisaun planu negosiu inovativu husi IADE,  maibe iha tinan ida ne’e sira sei hein tan oportunidade  atu hetan ba  programa ida ne’e dehan katak, no fin governu bele fasilita fasilidade  negosiu nian, para bele transforma  ona  ba mini merkadu.

“Xa ne’ebé mak ami kuda ona iha ne’eba Senai ho intensaun katak atu habarak produtu ne’e iha rai laran, maibe presiza fasilidade governu atu fasilita makina para produsaun ne’e bele lao, tanba ne’e ami husu IADE ami nia prepasaun mak ne’e, iha ona plantas ami hahu atu kuda  maibe iha parte ida mos suporta atu hamusu tan produtu ida,primeiru ita tenki nasionalismu ita nia produtu rasik,” nia informa tan. 

Nia mos haktuir tan katak, xa agora dadauk ne’e  tama ona ba merkadu nasional, hanesan iha Timor Plaza super market Kmanek, Pateò, Dili Mar, Bemorin inklui mos munisipiu sira,  maibe iha pratikamente produsaun   xa ne’e fa’an  iha Timor laran tomak, I depois produtu ne’e  laos xa deit maibe iha temperus  mos  fa’an hotu, tanba ai figeira ne’e halo produsaun hotu-hotu, produsaun ne’e hahu iha tinan kotuk 2014, produsaun xa fulan ida   produs Sa  360 pak. (BT)