LEE JORNAL: Benefisiariu programa jornal gratuita iha Munisipiu Covalima hanesan sede Suku Cassabauc (karuk leten) no Suku Maudemo (karuk kraik) asina resibu simu jornal Business Timor husi sirkulador Acacio Bragansa. Diretora Uma Mahon Centro Esperança ba Feto iha Salele, Madre Santina Imaculada de Oliveira (kuana leten) no Administrador Hospital Referal Suai Elizio Gusmão lee hela jornal Business Timor. Foto BT/C. Malilaka
LEE JORNAL: Benefisiariu programa jornal gratuita iha Munisipiu Covalima hanesan sede Suku Cassabauc (karuk leten) no Suku Maudemo (karuk kraik) asina resibu simu jornal Business Timor husi sirkulador Acacio Bragansa. Diretora Uma Mahon Centro Esperança ba Feto iha Salele, Madre Santina Imaculada de Oliveira (kuana leten) no Administrador Hospital Referal Suai Elizio Gusmão lee hela jornal Business Timor. Foto BT/C. Malilaka

LEE JORNAL: Benefisiariu programa jornal gratuita iha Munisipiu Covalima hanesan sede Suku Cassabauc (karuk leten) no Suku Maudemo (karuk kraik) asina resibu simu jornal Business Timor husi sirkulador Acacio Bragansa. Diretora Uma Mahon Centro Esperança ba Feto iha Salele, Madre Santina Imaculada de Oliveira (kuana leten) no Administrador Hospital Referal Suai Elizio Gusmão lee hela jornal Business Timor. Foto BT/C. Malilaka
SUAI----Komunidade iha Munisipiu Covalima durante sei hasoru difikuldade oinsa bele asesu informasaun liu husi media liu-liu media imprensa hanesan jornal iha sira nia knua. Ba jornalista ne’ebé akompaña programa sirkulasaun jornal Business Timor ho gratuita iha Munisipiu Covalima, benefisiariu sira hatete sira agradese tebes bele hetan jornal Business Timor tanba durante ne’e seidauk iha jornal ne’ebé sirkula iha sira nia area.

Madre Santina Imaculada de Oliveira,SSpS, diretora Centro Esperança ba Feto ka Uma Mahon iha Salele, Postu Tilomar hato’o agradese bainhira simu jornal Business Timor tanba sira presiza duni informasaun husi media maibe laiha jornal nasional ida  mak sirkula to’o Salele. “Ami presiza duni asesu informasaun, maibe iha ne’e ami la hetan media imprensa. Tanba ne’e agradese ba Business Timor mai to’o iha ami nia fatin hodi fo jornal gratuita,” hatete Madre Santina ne’ebé fo asistensia ba labarik no feto sira ne’ebé sira nia moris iha risku ba violensia domestika ka violensia bazeia ba jeneru.

Uma Mahon Centro Esperança ba Feto iha Salele ne’e, presiza mos asesu media komunikasaun social tanba ho pesoal voluntariu nain 16 ne’ebé iha presiza hatene sa dezenvolvimentu mak akontese iha rai laran. Iha Uma Mahon ne’ebé harii iha 2006 ne’e sira fo asistensia advokasia no kapasitasaun ba vitima violensia bazeia ba jeneru hanesan suku, tein, no mos kria atividade industria ki’ik hanesan produs sabaun, pomade milagrozu hodi kura isin katar, lilin, tersu, no aifunan.

Nune’e mos Administrador Hospital Referal Suai Elizio Gusmão hato’o agradese bele hetan jornal Business Timor tanba durante ne’e sira presiza tebes informasaun husi jornal maibe jornal la sirkula iha Suai. Programa fahe jornal iha area rural ne’e apoiu husi Sekretaria Estadu ba Komunikasaun Sosial (SEKomS) liu husi orsamentu transferensia publiku. Ba tinan 2015 ne’e Business Media Group Lda hetan apoiu husi SEKomS halao programa distribui jornal ba munisipiu haat, Munisipiu Viqueque, Aileu, Covalima, no Oecusse. Kada munisipiu hetan jornal Business Timor 75 copy ka exemplar.

Bazeia ba proposta Business Media Group ne’ebé SEKomS aprova katak jornal semanáriu Business Timor sei distribui ba eskola husi nivel baziku to’o sekundaria publiku no privadu, ospital, sentru no postu saude, klinika sira tantu publiku no privadu, sentru relijioza hanesan igreja parokia no estasaun minonaria, sede suku sira iha munisipiu haat refere. Durante programa ne’e la’o, hodi distribui ba benefisiariu sira, sirkulador Business Timor la konsege to’o iha fatin balu ne’ebé dook no estrada aat ba transporte.

Ezemplu iha Munisipiu Covalima laran, jornal Business Timor seidauk bele fahe to’o Postu Administrativu Fatu Lulik, Fatu Mean, Fohorem, Tilomar balu, no Maukatar balu. So Postu Administrativu Suai no Zumalai mak bele kobre hotu. “Fatin sira ne’e ita bele kobre hotu maibe molok programa distribuisaun jornal ne’e hotu ita nia motor bele aat kedas tanba kondisaun estrada ba fatin sira ne’e la diak. Se ita obriga tenke hasai kustu maka’as ba mina no mos manutensaun ba motorizada,” hatete Acacio Bragansa, sirkulador jornal Business Timor nian iha Suai. (BT)