DILI----Kompañia Telekomunikasaun Timor Telecom (TT) hetan prémiu iha segunda edisaun Stevie Awards Ázia-Pasífiku 2015 nian. Únika operadora Timor-Leste nian ne’ebé hetan prémiu, TT simu Bronze iha kategoria “Produtu Foun, Serbisu Produtu no  Serbisu Konsumidór” Liu husi karta komunikadu ne’ebé Business Timor simu iha loron 28/04 foin lalais ne’e hateten,  TT simu Bronze ho kategoria ne’e tanbá nia projetu “Wikipedia Zero”.

Iha Setembru 2014, TT anunsia parseria ho organizasaun ne’ebé jere Wikipedia no, hahú husi ne’ebá, oferese asesu ilimitadu no gratuitu ba site refere, ho inisiativa ne’ebé benefisia timoroan hotu, liu-liu komunidade estudantil ho nune’e bele haboot sira nia koñesimentu. Iha komunikadu ne’e hateten premiu internasional ne’e TT hetan ba dala rua ona. Hanesan iha tinan 2014, hetan mós prémiu husi Stevie Award ho bronze, iha kategoria “Customer Service Leader of The Year”, tanbá restruturasaun ne’ebé halo iha nia Call Center.

Restruturasaun ida ne’ebéiha edisaun International Business Awards sira (ba eskala mundiál) hetan mós premiu ho Stevie Award Osan-Mutin ida. Asia-Pacifific Stevie Awards sira hanesan úniku galardaun ne’ebé rekoñese nasaun 22 husi rejiaun. Stevie Awards sira mós konsideradu hanesan prémiu emprezariál iha nível mundiál ne’ebé importante liu, oferese, iha dékada ida resin, rekoñesimentu ba konkista ne’ebé hetan iha programa sira hanesanThe International Business Awards.

Alkuñadu ho Stevies tanbá liafuan grega ba “coroado”, prémiu sira sei entrega ba manán-na’in sira iha gala ne’ebé sei hala’o iha InterContinental Hotel, iha Xangai, Xina, iha 5 juñu. Nomeasaun organizasaun husi rejiaun Ázia-Pasífiku 400 resin konsiderada iha tinan ne’e, iha kategoria hanesan Empresa do Ano, Diretor do Ano no Website do Ano. “Hafoin prémiu sira maka simu iha tinan 2014, ida ne’e sai tan prova ida katak lideransa Timor Telecom nian iha merkadu la’os ho akazu. Iha ho sira ne’ebé di’ak liu iha Ázia no to’o iha mundu no distinsaun Wikipedia Zero ne’e duplamente gratifikante tanbá akontese projetu ho karáter sosiál ne’ebé boot. 

Projetu ne’ebé permite ba timoroan bele hetan asesu ba mundu koñesimentu nian, ho forma gratuita, buat ne’ebé TT de’it maka propoin atu halo, tanbá rekoñese importánsia dezenvolvimentu sosiedade timoroan nian”, konsidera administradór delegadu Timor Telecom nian, Manuel Joaquim Capitão Amaro. Manán-na’in sira husi Stevie Award Osan-Mean, Osan-Mutin no Bronze selesiona husi diretór 50 iha mundu, ne’ebé partisipa iha ronda avaliasaun dahuluk nian iha fulan Marsu no Abril. Painél juradu internasionál daruak sei hili manán-na’in Grand Stevie husi sira ne’ebé premiadu ho Osan-Mean iha fulan maiu. Manán-na’in husi Grand Stevie sei fó sai iha 5 juñu, iha Xangai. (BT)