GLENO-East Timor Coffee Institute (ETCI), iha sabadu (13/09) selebra Dies Natalis (loron moris) ba dala 11 iha Kampus ETCI, Gleno Distritu Ermera. Iha selebrasaun ne’e prezensa mos fundador sira, korpu dosente no estudantes ETCI tomak, halo reflesaun oinsa atu dezenvolve ETCI iha futuru. Fundador sira ne’ebé partisipa iha Dies Natalis ETCI ne’e mak hanesan Deonisio Babo, Olandina Caeiro, Gilman Exposto, Reitor ETCI rasik Lucio Gomes. ETCI harii iha tinan 2003 inisiativa intelektual sira Distritu Ermera nian.

Deonisio Babo, atual ministru justisa, ba jornalista BT iha kampus ETCI hatete, uluk sira hari fundasaun ida naran Kafé LAHER (Letefoho, Atsabe, Hatulia, Ermera, Railaku). Hafoin sira iha hanoin atu halo buat ruma ba distritu Ermera. Entaun sira tau hanoin hamutuk hodi hari’i ensinu superior ida ho naran East Timor Coffee Academy (ETICA). Eskola ne’e loke ba Ermera oan sira atu estuda no kapasita sira iha fatin ne’e.

“Ha’u sente kontente tebes ho esforsu ETCI nian tamba tinan barak mak ha’u la mai vizita maibe ohin loron ha’u mai hare fali kampus ne’e mudansa tebes no produs mos estudantes barak no estudante sira mos iha kualidade ba edukasaun. Hanesan uluk sira ba kompete iha Dili sira sempre hetan juara hela deit,” Deonisio hatete. Eskola ida ne’e hetan akreditasaun nivel nasional hodi sai hanesan institute. ETCI sai mos fatin peskiza siensia ida hodi deskobre buat balun ne’ebe ita iha hodi fa’an fali ba nasaun seluk. Nia mos husu ba estudante sira ne’ebe estuda iha fatin ne’e atu kreativu sai matenek ne’ebé la’os husu servisu deit ba estadu ka governu.

“Matenek ne’ebe imi hetan keta subar e keta tur deit hodi hein no husu serbisu ba estadu ka governu, no ita maka kreativu maka’as hodi kompete iha fatin hotu-hotu,” nia hatete. Fatin hanesan Gilman Exposto dos Santos, hanesan mos fundador haktuir katak bainhira sira harii eskola ne’e ho naran ETICA, iha momentu ne’eba hetan apoiuh makaas husi kompañia NCBA. Fundador sira mos fo kontribuisaun uitoan hodi hari’i akademia ne’e. Tuir nia, iha momentu ne’eba fatin laiha ba sira atu hari’i akademia refere. Sira halo ligasaun ho Tomas Gonçalves, eis Bupati Ermera iha tempu Indonesia hodi oferese fali eskola SMA 17 ba sira hodi hari’i akademia refere.

To’o tinan 2009 ETICA konsege halo primeira graduasaun ho estudante hamutuk 50. Nia espera katak iha tempu oin mai institutu ne’e bele sai diak liu tan no iha kualidade ba estudante sira. Hanesan Ermera oan, Gilman sente orguillu tebes ho institute ne’e tamba iha distritu barak seidauk iha  ensinu superior, maibe cabang husi universidade sira iha Dili maka maioria. Nia mos husu ba empresariu Ermera oan sira hotu atu bele fo kontribuisaun hodi dezemvolve Distritu Ermera liu husi intitutu superior ida ne’e ho diak ba futuru. Reitor ETCI, Eng. Lucio Marçal Gomes iha nia intrevista hateten, loron ne’e importante tebes ba Ditritu Ermera no povu Ermera oan sira hotu nebe estuda iha fatin ne’e. Fundador sira, intelektual Ermera oan sira ne’ebe fo sira nia kontribuisaun maka’as hodi hari’i intitutu ida ne’e.

“Ohin loron ita selebra ka hanoin hikas fali loron moris institutu ida ne’e nian, ne’ebe maka hari’i iha dia 13 de Maio tinan 2003, no mai to’o tinan 2008 ho estudante hamutuk 420  hodi hetan akreditasaun nivel nasional ba akademia, depois tinan 2009 halo graduasaun ba estudantes hamutuk 50, to’o 2012 akademia ne’e nakfilak an ba institutu ho nia fakuldades tolu hanesan, Fakuldade Agrikultura, Fakuldade Edukasaun, Fakuldade Manegementu Públiku,” nia esplika. Fakuldade tolu ne’e iha departamentu sia (9) ho mos nia programa rua maka, Baixarelato no Lisensiatura. Nia  hatete ho institutu ida ne’e Ermera mos bele produs nia intelektual husi rai laran rasik. Institutu ne’e mos la taka dalan ba timoroan sira ne’ebe hakarak ba estuda iha  ne’e.

Reitor ne’e mos reforsa tan katak, ETCI mos halo ligasaun ho universidade sira iha mundu internasional hanesan Indonesia, Australia no Portugal. Objetivu husi koperasaun ida ne’e atu dezenvolve kualidade edukasaun iha Timor-Leste. “Maske tinan hirak liuba iha difikuldade balun mak ami hasoru maibe ami konsege duni hari’i intitutu ida ne’e ho diak,” Lucio hatete. Liu husi koperasaun ne’e mos haruka estudante sira ne’ebe hotu sira nia estudu iha ETCI ho nivel baisarelato iha posibilidade atu ba kontinua sira nia estudu ho nivel lisensiatura iha universidade sira ne’ebe ETCI halo koperasaun ba. “Ba alunu sira ne’ebe iha predikasaun maka’as ami iha posibilidades atu haruka sira ba,” Reitor ne’e hatutan. Nia garante katak, iha futuru oin mai ETCI sei sai kualidade edukasaun ida ne’ebe diak liu  universidade sira hotu iha Timor laran tomak. (BT)