OE-CUSSE-Sekretáriu Estadu Komunikasaun Sosiál (SEKOMS) Nelio Izaac Sarmento hatete nia hala’o vizita bá hare radio komunidade Oe-Cusse ninia infra-estrutura no mós kondisaun di’akliu kompara ho radio sira seluk  iha timor laran tomak. Nia hatete objetivu vizita refere tanbá radio komunidade ninia responsabilidade entermus apoiu husi nasionál bá radio ne’ebé oras ne’e instala ona iha Oe-Cusse.

“Hau bá hare to’o kondisaun radio refere radio komunidade Oe-Cusse nia infra-estrutura no mós ninia kondisaun  kompara ho radio iha timor laran tomak Oe-Cusse nian di’akliu,”dehan Sekretáriu Estadu Komunikasaun Nelio Isaac Sarmaento bá BT, Segunda (21/04) semana liu-bá molok vizita radio Oe-Cusse iha subdistritu Pante-Makasar, distritu Oe-Cusse.       

SEKOMS sei enkoraza sira atu nune’e komunidade sira iha Oe-Cusse tenki senti nia-an katak radio refere sira nian la’os governu nian maibé governu apoiu de’it. Nia promote katak sei bá fali iha radio refere loron ida atu nune’e bele organiza nafatin  komunidade sira hodi mobiliza serbisu radio komunidade refere atu nune’e preparasaun bá  selebrasaun tinan 500 iha Oe-Cusse. Nia hatete agora daudaun serbisu SEKOMS  sei la’o hela koordenasaun ho operador Telekomunikasaun sira atu nune’e fasilita RTTL halo transmisaun hahú iha Oe-Cusse bá to’o  timor laran tomak.

Se iha mós informasaun relevante kona-bá programa ZEESM nian relasaun ho selebrasaun tinan 500 oras ne’e daudaun sira serbisu no mós halo liña koordenasaun bá malu klaru katak informasaun sei fó nafatin bá Jornalista sira. Alende BT konfirma kona-bá proposta ne’ebé hatama iha  SEKOMS nia hatete proposta hamutuk 50 resin ne’ebé agora daudaun prosesu la’o hela sira halo evaluasaun final, karik semana oin bele hetan rezultadu no mós apoiu husi SEKOMS bá kapasitasaun instituisaun no kapasitasaun mós ba Jornalista sira. 

Proposta refere iha area hanesan, reforsa  sira ninia instituisaun media atu nune’e bele fó hanoin bá komunidade, balu atu apoiu joven sira iha rekursu umanu. iha tempu badak kada institutu sei hetan apoiu husi SEKOMS hanesan osan no mós material. Tuir observasaun BT iha terenu katak radio komunidade refere di’akliu kompara radio sira seluk iha timor laran tomak, kondisaun radio refere di’akliu ho radio sira seluk. (Business Timor)