News

  1. Ekonomia
  2. Politika
  3. Desportu
  1. Lalenok Sidade Dili
  2. Ami nia Lian
  3. Opiniaun


DÍLI—Konstituisaun RDTL rekoñese katak bee-moos nu’udar rekursu naturais estadu nian hodi utiliza ba interese nasionál tanba iha valór sosiál no tenki uza ho efisiente ba ema hotu. Maibé realidade hatudu katak dalan sei naruk ba komunidade sira liu-liu Díli atu asesu bee-moos ho di’ak. Kestaun ne’e hato’o husi Diretór ONG Luta Hamutuk, Merício Akara ba BT iha nia kna’ar fatin, Farol, foin lalais ne’e. Iha tinan 2013, nia haktuir, Distritu Díli kontinua hetan alokasaun orsamentu hamutuk $11,936 milloens maibé orsamentu ne’ebé maka aloka tiha ona ne’e seidauk bele rezolve kestaun bee-moos iha Díli laran tomak.

Akara esplika, iha ona peskiza barak ne’ebé maka aprezenta situasaun real povu nian kona-ba asesu ba bee-moos no mós kondisaun saneamentu iha área urbana inkluindu iha Distritu Díli ne’ebé hatudu katak, bee-moos tuir loloos sufisiente hela maibé realidade hatudu maioria povu sei falta asesu bee-moos. Hanesan ezemplu Becora,Taibessi, Lahane, Kakaulidun, Farol, Manleuana no Comoro sei hasoru problema bee-moos.

“Bazeia ba dadus husi Governu katak, asesu komunidade ba bee-moos iha Distritu Díli atinji ona entre 80-100% (Fontes: Livru OJE 2013 No. 3, pájina 9). Dadus ne’e hatudu katak, asesu bee-moos iha Distritu Díli di’ak liu kompara ho distritu sira seluk. Ami haree katak dadus ne’e sei kontradisaun ho realidade ne’ebé Luta Hamutuk deskobre, tanba komunidade iha Díli sei infrenta problema falta bee-moos,” nia informa. Nia haktuir, povu sei konsumu bee mota iha tinan barak nia laran ba nesesidade lor-loron nian, nune’e mós lori jerigen mamuk tún-sa’e buka bee-moos no halo kuak kanu iha fatin públiku sira hodi bele asesu ba bee-moos.

“Nivel polítika orsamentál iha 2011, governu muda ona jestaun infraestrutura ba iha Ajénsia Dezenvolvimento Nasionál (ADN) liu husi fundu infaestrutura nian, hodi finansia bee-moos atu atinji MDG 2015 ho alokasaun orsamentu hamutuk $20,420 milloens de dóllares,” Akara haklaken. “Nune’e mós iha 2012, aloka tan $40,420 miloens (inklui alokasaun husi osan impréstimu nian). Hanesan mós Iha Strategic Development Plan 2011-2030 katak, bee-moos sai prioridade nune’e preodikamente sei aloka osan kada tinan to’o atinji $94.2 milloens hodi komple ta bee-moos iha área urbana sira,” nia hatutan.

Akara hateten, falta bee-moos ba povu tenki konsidera nu’udar situasaun ida maka grave no tenki konsidera ona hanesan situasaun emerjénsia. Tanba emerjensia, presiza mós hetan atuasaun extraordináriu atu rezolve emidiata no lalais husi estadu, liu-liu Governu. “Ho realidade no razaun hirak iha leten, ami hakarak rekomenda ba Primeiru Ministru atu aplika lalais karater emerjénsia ba projetu bee-moos iha Díli laran tomak. Ho karater emerjénsia ne’e, ami husu atu iha fulan tolu nia laran, mínimu Governu tenki rezolve ona problema bee-moos iha Díli laran,” nia propoin. (Ajhu)