DÍLI—Maria Marix hanesan vendedora obralan no fa’an modo hatete, antes 20 Maiu liu-ba, estadu muda sira husi merkadu Komoro ba Merkadu foun Manleuna.

Maibé, nia dehan, to’o agora sira fa’an sasan iha merkadu Manleuna fila fali mai merkadu Komoro. Sira kuaze atus ida resin maka mai fali iha eis merkadu ne’e tanba sasan la folin. “Hanesan obralan, modo tahan no ai-fuan barak maka estraga tanba ema ladun hola,” nia dehan ba jornalista sira iha Merkadu Komoro, Segunda (27/8).

“Ha’u atu foti osan iha ne’ebé ba kompras fali liu-liu modo tahan no ai-fuan sira ne’e. Transporte bá Hali-Laran no bá Merkadu Manleuana mós selu karun. Ha’u buka moris la’os atu lakon maibé tenke osan tama no osan ne’ebé sai mós hanesan. Sasan estraga maka barak maibé atu hola fali osan laiha,” Maria hatutan. Nia informa, estadu hatene muda sira maibé laiha responsabilidade ba sira.

“Ha’u fa’an obralan no modo tahn mós hetan de’it $ 1.00 no $2.00 loron ida. Ne’e pursentu menus liu. La hanesan uluk ne’ebé ha’u fa’an iha merkadu Komoro,” Maria hatutan. Nia husu ba estadu foun tenki muda sira dala ida ba fain ida. Labele muda sira ne’ebé maka buka moris iha merkadu Komoro maibé muda mós maluk sira seluk iha merkadu merkadu Hali-Laran no ema ne’ebé fa’an sasan iha dalan ninin tanba ida ne’e hanesan impaktu boot ida ba sira. (R-5)